Assam : CM-in Jamunamukh Railway overbridge hawng

Assam chief minister Himanta Biswa Sarma chuan Thawhṭanni khan Hojai district-a railway overbridge sak thar a hawng. He overbridge hi metre 951-a thui a ni a, Rs vbc 83 senga sak a ni. Inkalpawhna awlsam zawkna turin, motorable carriageway metre 7.5-a zau a siam a ni bawk.

Chief Minister-in Hojai district a tlawh chhung hian virtual-in Balijuri Tea Estate-a Model High School leh Jagannath Community hall pathum bakah Kandali, Dhantola leh Sagunbahi Tea Estates-a Skill Centre a hawng bawk. Hei bakah Barhampur Higher Secondary School leh, Jamunamukh Higher Secondary School building thar sakna tur lungphum a phum bawk a ni.

CM Sarma chuan tuilian venna tur eng emaw zat leh, Nagaon Water Resources Division hnuaia road-connectivity project-te a hawng bawk. Project thawh tur zingah Kopili lui dinglam kama Jamunamukh- Chikamari aṭanga Milonpur leh, Jamunamukh aṭanga Patiapam thleng hna thawh tur te, Bakulguri aṭanga Jamunamukh RCC bridge, Jamunamukh bridge aṭanga Premjan-Gosaigaon, Gosaigaon aṭanga Chaibuk, leh Pub-Kawoimari aṭanga Borchung thleng hna thawh turte a tel.

Vantlang inkhawma thu a sawiah, Chief Minister chuan overbridge thar chuan Dabaka, Kampur leh Jamunamukh rel station huam chhunga mite intlawhpawh a ti awlsam dawn tih a sawi. Kampur leh Jamunamukh chuan kumtin tuilian an tuar ṭhin a, tuilian venna project, Rs vbc 80 man hu thawh a ni tawh tih a tarlang bawk.