Tripura : Homeopathic, ayurvedic medical college sa dawn

Tripura chief minister Manik Saha chuan Thawhlehni khan thuchhuah siamin, homeopathic medical college leh Ayurvedic medical college thar sak a ni dawn tih a sawi. Medical college pahnih sakna tur, Rs vbc 140 chu Union Ministry of AYUSH-in a pawm tawh tih a tarlang bawk.

Chief Minister kaihhruaia Civil Secretariat-a high-level meeting neihah medical college pahnih sak chungchang hi an sawi ho a ni. Meeting-ah hian Health and Family Welfare department changtu ni bawk, CM chuan medical college sak hna thawh ṭan a nih hmain state pawna homeopathic leh Ayurvedic medical college-te tlawh a, tawnhriat neih a pawimawh tih a sawi.

Saha chuan state pawn homeopathic leh Ayurvedic college-a an state zirlaite lak luh tum a nih thu a sawi bawk. Tun hmain state mipuite chuan homeopathy leh Ayurvedic hmanga inenkawlna an rintawk thu sawiin, chhunzawm zel a ni dawn tih a tarlang. Medical college pahnih sak turah hian seat 60 ve ve a awm dawn a, department hrang hrang pawh Chief Minister hnenah slideshow hmangin entir a ni.

Homeopathic Medical College hi Agartala-ah sak a ni dawn a, Ayurvedic Medical College chu Gomati district-ah sak a ni bawk ang. Meeting-ah hian Health Department mi pawimawhte leh, National AYUSH Mission member-te bakah Family Welfare and Disease Prevention Department official-te an tel.