Meghalaya : CM-in Youth Engagement Programme hawng

Meghalaya chief minister Conrad K. Sangma chuan December 2 khan NEHU Campus-ah December 5 aṭanga neih ṭan tur, Chief Minister's Youth Engagement Programme a hawng. State hmun hrang hrang aṭangin ṭhalai eng emaw zat an pungkhawm a; art, infiamna, thil thar hmuh chhuah leh technology lama an thiam thil pholanna platform pawimawh tak a ni.

Hawnna inkhawma thu a sawiah, Sangma chuan sorkar hmalakna hrang hrang sawilangin, chung zingah chuan skill training, hospitality programme, entrepreneurship scheme leh Drug Reduction, Elinimination leh Action Mission (DREAM) te an tel. New Shillong-a infrastructure thawmṭhat leh, National Games atana inbuatsaihna kalpui mek a nih dan a sawi bawk.

Programme-a tel zinga mi 48-te chu Philippines leh Malaysia-a zin tura thlan an ni dawn a, national-level inelnaa Meghalaya aiawha tel turin mi 500 vel thlan an ni bawk ang. Sports and youth affairs minister, Wailadmiki Shylla chuan state chu block level-a ṭhalaite tana programme buatsaih awmchhun an ni tih a tarlang. State inelnaa pakhatnate chu national youth festival-ah an tel thei dawn a, runner-up-te chu Northeast youth festival-ah an tel bawk dawn a ni.

Programme-ah hian mimal leh pawl angin category hrang hrangah a tel theih dawn a; poem, thawnthu, lemziah, vantlang hmaa thusawi, ṭingṭang perh, folk song, folk dance, science kaihhnawih thil thar hmuhchhuah leh quiz hmanga inelnate neih a ni ang.