Sikkim : Tourism sector-ah TSD Fund kalpui dawn

Sikkim sorkar chuan tourism ngelnghet neihna turin, khualzin thlenna hmun neitute chu Tourism Sustainable Development (TSD) fund-ah sum thawh turin a hriattir. He hmalakna hi infrastructure hmasawnna tur leh vantlang hamṭhatna tura duan a ni.

Tourism leh Civil Aviation department thuchhuah siam tharah; hotel, resort, homestay, bed-and-breakfast leh service apartment-te chu khualzin pakhatah fee Rs 50 la zel tura tih an ni. Fee an lakkhawmte chu digital platform, Atithi Guest Information System kaltlangin sorkar hnenah an theh lut dawn a ni.

TSD fund hi kumin March aṭang khan hman ṭan a ni a, state hmun hrang hranga tourism infrastructure tihchangtlunna tura hmalakna a ni. Fund-te chu kawng, trekking trail, inkalpawhna leh khualzin mamawh phuhrukna atan hman a ni ang. Khualzin thlengtu eng emaw zat chuan Sikkim Registration of Tourist Trade (SRTT) Act, 2024 hnuaiah an hmang ṭan tawh a ni.

Thuneitute chuan he dan hi hmang ṭan thuai turin thupek an ti chhuak a, he dan hmang lote chu Rule 83 of the SRTT Rules, 2025 hnuaiah Rs 5,000 aṭanga Rs 10,000 thleng chawitir theih an ni dawn. Thla thum hnuah pawh an la hmang lo a nih chuan an reistration hlihsak an ni dawn a, sumdawnna kalpui phalsak an ni dawn lo.