Manipur : ACS-in Imphal airport tihzauh hna endik

Manipur khawpui Imphal International airport-a Airport Terminal leh Cargo Terminal thar sak hnathawh mek chungchangah, additional chief secretary (Transport & TCI) Anurag Bajpai chuan Ningani khan high-level review meeting a ko a, department kaihhnawihte chu hnathawh chawlh lailawkte thawh zawm a, nakkum December 31-a peihfel hman turin a hriattir.

Review meeting-ah hian transport director Khumanthem Diana Devi, Dy. secretary Orjubala Haorongbam, Airports Authority of India (AAI) aiawhte leh PWD engineer-te bakah Yaishnand leh Brahma construction firm-a project team-te an tel.

Meeting-ah hian construction company-te chuan harsatna an tawh hrang hrang an sawilang a; Dimapur bula kawng chhia chuan lirthei leh bungrua phurh kawngah harsatna a thlen tih an sawi. Tui connection a rang lama an mamawh thu sawiin, MSPDCL aṭanga electric load tih chak leh, National Highway aṭanga terminal thar pawh tura kawng thawmṭhatte a tel.

Bajpai chuan department tinte chu hun tiam khauh tak pein, terminal thar chu intlawhpawhna, passenger facility leh state economy ṭhanlenna atana pawimawh tak a ni tih a tarlang. PWD chu kawng siamna turin ram lei phalna buaipui turin a hriattira, Transport department chu PHED leh MSPDCL hnenah tui connection leh power ti chak tura inbiakna nei turin a chah bawk.

Review meeting neih zawh hian ACS chuan terminal building, apron, tarmac leh ATC tower a endik bawk a ni. Official-te chuan hna khirh zualpui thawh mek a nih thu leh, a chung hulhliap pawh nakkum April aṭanga thawh ṭan an beisei tih an tarlang. ATC tower thar erawh sak zawh tawh a ni.