NE-ah CAB hmang dawn lo

Citizenship Amendment Bill (CAB) draft-ah chuan hmarchhak biala state pathum, Inner Line Permit (ILP) system hman mekna - Arunachal Pradesh, Nagaland leh Mizoram chu he bill hian a huam ve dawn lo nia sawi a ni. Hei bakah hian hmarchhak state dang pathumah pawh tribal area bik a huam tel dawn lo bawk. 

Union home minister Amit Shah-a'n hmarchhak bial aṭanga pawl pali aiawh, mi pakuate nena meetinng an neihnaah hei hi sawi a ni. Inner Line Permit  system hi  Bengal Eastern Frontier Regulation, 1873 hnuaiah Arunachal Pradesh, Mizoram leh Nagaland-ah hman mek a ni. Heng state-ah hian CAB hi hman a ni ve dawn lo nia sawi a ni. Assam, Meghalaya leh Tripura-a tribal area, 6th Schedule of Constitution hnuaiah autonomous council leh district dinna hmunte chu CAB hian a huam dawn lo nia sawi a ni bawk. Mahse heng state pathuma non-tribal area-ah chuan CAB hi hman a ni thung ang. Hetihlai hian Sikkim chungchang erawh sawilan a ni lo thung. 

Union cabinet-in CAB a pawm hma, Thawhlehni zan khan Amit Shah chuan CAB duh lotu pawl pali aiawhte hi a kawm a, he bill hian hmarchhak bial leilung fate  humhalhna chu a tihchhiat loh tur thu te  a hrilh nia sawi a ni. Amit Shah kawmtute hi Manipur People Against Citizenship Amendment Bill (MANPAC), Zeliangrong Union (Assam, Manipur, Nagaland unit), The North East Forum for Indigenous People (NEFIP) leh Kuki Inpi Manipur (KIM) Imphal Unit aiawhte an ni. 

He meeting-ah hian Assam, Manipur leh Nagaland chief minister-te pawh an tel. Sorkar laipui chuan union cabinet-in a pawm tak avangin  sawi hlawh tak, CAB hi karleh hian Parliament-ah pharh a ni dawn tih Business Advisory Council (BAC) hnenah a hriattir.