Tripura-in 'Super 30' project kalpui dawn

Tripura sorkar chuan pilot project, 'Super 30' tih chu 2020-21 academic session aṭangin kalpui a tum. 

'Super 30' hi Tripura Board of Secondary Edu­cation (TBSE) in Class -X standard examination a buatsaiha top rank holder-te coaching fee pekna tur sum a tumsakna tur a ni. State cabinet chuan Nilainia meeting a neihah he thutlukna hi siamin, Ningani khan state education minister Ratan Lal Nath chuan Agar­tala-a media miten an kawmnaah a sawi a ni. 

Minister chuan a kum khatna atan 'Super 30' project hnuaiah science stream zirlai ti ṭha 30-te chu Kota-based coaching insitute-ah NEET or JEE an tlang theihna turin coaching an kaltir an ni ang. Tripura zirlaite chuan theihna sang tak an nei a ni tiin, state sorkarin an tana hun remchang ṭha a ngaih­tuahsak theih chuan state dang zirlaite pawh an khum thei dawn tih minister chuan a sawi bawk. 

'Super 30' project hnuaia zirlai thlan chhuahte lehkha zirtirna tur hian, a kum khatnaah zirlai pakhatah cheng nuai 2.40 sengin an vai atana an senso tur hi cheng nuai 72 a ni a, a kum hnihnaa sorkarin a sen tur hi cheng vaibelchhe 1.44 a ni thung tih Ratan Lal Nath chuan a sawi. Zirlaite hian national insitute, AIIMS, IIT, NIT leh IIIT te an luh theihna turin state sorkar chuan theihtawp chhuahpui a tum a, hemi atana hian he project hi a duang a ni.