Meghalaya sorkarin HNLC nena inbiak inpeih

Meghalaya chief minister Conrad Sangma chuan a kaihhruai sorkar chuan dan pawna hnawl, Hynniewtrep National Li­beration Council (HNLC) chu remna kawng zawnga inbiakna neihpui a inpeih reng thu a sawi. 

Sorkar laipui chuan thla hmasa khan HNCL hi kum rei tak tharum thawhna thlen leh, inpumkhatna tichhe zawnga an chet vangin dan pawnah a hnawl a ni. HNCL hian Khasi leh Jaintia chenna ram chu India lak aṭanga lak hran an duh a ni tiin ministry of home affairs chuan November 18 khan a sawi a ni. 

Chief Minister chuan HNLC nen hian intiamkamna ṭhat tak awma inbiakna neih an inhuam thu a sawi. Hemi rual hian inbiakna an neih dawn chuan helpawlte hian an ralthuamte an dah thlak a, tharum thawhna an bansan leh, thuneitute kuta an inpek phawt a ngai ang," a ti. 

HNLC hian tunhnaiah an helna bansan an hreh loh thu sawiin, sorkar laipui leh state sorkar chu remna siam dan kawng ngaihtuah turin a lo ngen tawh a ni.