Assam : TUUF-in Tezpur University shutdown tum

Assam-a Tezpur university-a zirlai, zirtirtu leh non-teaching staff intelkhawm, Tezpur University United Forum (TUUF)-ten kumin September thla laihawl aṭanga vice chancellor Shambhu Nath Singh chu eiruk leh, thil dang dik lo eng emaw zat tiah puhin, a chunga hremna lekkawh tur leh, a nihna aṭanga bang tura an phut avangin lungawi lohna an lantir.

Hemi chungchangah hian TUFF chuan, ni 79 chhung muanawm taka lungawi lohna an lantir hnuah pawh hmalakna hmuh tur a la awm lo tih an sawi. Lungawi lohna lantirtute chuan nimin Pathianni khan VC ban tura sorkar laipui aṭanga inbiakna mumal tak neih a nih hma chuan university khar an tum tih an tarlang. Zirlaite chuan activity hrang hrang zingah zirna kaihhnawih tihtawp an tum bakah, thuneitute chu end-term exam cancel turin an nawr bawk.

Sonitpur district-a Brahmaputra chhim lam campus-ah Inrinni chawhnu lam aṭanga nimin Pathianni zing thleng khan boruak a sosang hle a, Union Ministry of Education-a mi pawimawh, secretary Vineet Joshi kaihhruaite chu zanlai pelh thlengin campus chhuahsan thei loin darkar thum aia rei an tang a ni. High-level team chu zanlai pelh hnuah campus aṭanga chhuahtir an ni.

Zirlai, faculty leh non-teaching staff-te chuan official-a inremna mumal tak siam a nih hma chuan thawhhona ṭha tak hnuaiah lungawi lohna an lantir chhunzawm zel dawn tih an sawi. Ni 79 chhung nawrh huaihawt a nih hnuah pawh TUUF chuan thutlukna an la nghak reng tih an sawi.