Tripura : Mipui 1% Civil Defence Volunteer training pe dawn

Tripura chief minister Manik Saha chuan, khuarel chhiatna thleng ṭhin atana invenna turin, Inrinni khan state-a mipui 1% chu Civil Defence Vollunteers (CDF) training pek an ni dawn tih a sawi.

All India Civil Defence and Home Guard Day vawi 63-na, Manoranjan Debbarma Smriti Stadium, Arundhuti Naga, Agartala khaw pawna programme buatsaiha thu a sawiah, Chief Minister chuan Civil Defence leh Home Guard volunteer-te chuan khuarel chhiatna thlengah hna pawimawh tak an thawk ṭhin tih a sawi. Tun dinhmunah Civil Defence Volunteers-ah hian state hmun hrang hrang aṭangin mi 5,000 training pek mek an ni tih a tarlang bawk.

State sorkarin Civil Defence volunteers training a pek dawn bakah, sorkar laipui chuan Civil Defence volunteers tih chakna atan project a kalpui bawk dawn a ni. Nakkum March aṭangin mi 3,000 vel training pek ṭan a ni dawn tih CM Saha chuan a sawi bawk.

Training programme hi Central Training Insitute leh district level-a training centre-ahte kalpui mek a ni. Saha chuan Civil Defence Volunteers, Home Guard, Apda Mitra leh volunteer dangte chu kum kalta aiin an pung tih a sawi bawk.