Meghalaya : Nakkum June-ah Assembly building peihfel dawn

Meghalaya Assembly speaker Thomas A Sangma chuan, New Shillong-a Mawdiangdiang-a Assembly buiding sak mek chu nakkum June thlaah peihfel a ni dawn tih review meeting neihah a puang.

Meeting-ah hian deputy chief minister leh parliamentary affairs minister in charge, Prestone Tynsong leh, Meghalaya legislative assembly commissioner leh secretary Andrew Simons bakah, Finance department senior official-te leh Parliamentary Affairs department, PWD, NIC Meghalaya leh Meghalaya Legislative Assembly Secretariat official-te an tel.

Sangma chuan review meeting-ah hian project thawh mek hmasawn dan leh harsatna awmte an sawi ho tih a tarlang. Speaker chuan thlatin endikna neih ṭhin a ni chuan hnathawh a tih chak phah tih a sawi. Review meeting thla tina neih ṭhin a ni chu hlawkthlak a tih thu tarlangin, hnathawh hmasawn dan uluk zawkin an hriat theih phah tih a tarlang.

Speaker chuan nakkum June thlaa Assembly Hall sak zawh tum chu thlak a ni dawn lo tih a sawi bawk. Hall chu sak zawh a nih hunah Assembly session pawh complex tharah neih nghal thuai a ni ang, a ti. Hei bakah Sangma chuan December 11 hian project thawhna hmun hi a tlawh dawn tih a sawi bawk.