Sikkim : MP-in SIR fimkhur zawka kalpui ṭul ti

Sikkim-a Nilainia Lok Sabha-a electoral reform chungchang sawi honaah, MP Indra Hang Subba chuan electoral roll ennawnna, Special Intensive Revision (SIR) chu fimkhur zawka kalpui turin sorkar laipui a ngen. Voter awm zatah danglamna lian tham thleng vek lo mah se, inthlan result nasa takin a nghawng thei tih a sawi.

Subba chuan registration aṭanga verification thlengin dikna, langtlang leh rintlak taka neih a ṭul tih sawiin, state leh mihring dinhmun nena inmil tura siamṭhatna neih a pawimawh tih a sawi. SIR chu electoral system tihchakna atan a pawimawh a, state-a mihring chen tlemnaah chuan uluk zawk leh mipui rintlaka kalpui a pawimawh tih a tarlang bawk.

Sawi hona an neihah hian union home minister Amit Shah leh, Lok Sabha leader of opposition (LOP) Rahul Gandhi-te chu “vote chori” (vote rukbo) chungchangah nasa takin an inhnial bawk. Rahul Gandhi chuan tun hnaia press conference neiha Shah-a'n a puhna chungchangah zawhna zawtin, Shah chuan SIR chu vote thlak thei thlitfimna atana hmalakna pawimawh tak a nih thu a sawi a, eptu pawlte chu inthlan chungchang siamṭhatna tur dodaltuah a puh bawk.

Shah chuan BJP-in mipui vantlang tana hna a thawh ṭhat avangin harsatna an hmachhawn tlem tih sawiin, inthlan result chu voter list siamṭhatnain a nghawng lo, a ti. Rahul Gandhi chuan vote neitute bumna nia a sawi chungchang chu chipchiar taka sawi ho a phut a, mahse Shah chuan parliament thutlukna chu mimal thil phut hmanga thunun theih a ni lo tih a sawi ve thung.