Arunachal Pradesh : Police-ten J&K mi pahnih man

Arunachal Pradesh khawpui, Itanagar police-te chuan Pakistan tana enthlak hna thawktu nia sawi mi pahnih an man. An mi mante hi Nazir Ahmad Malik leh Sabir Ahmed Mir, Jammu & Kashmir-a Kupwara khuaa cheng an ni a, police-te hian enthlak hna thawhnaah an inrawlh tih thu rintlak an dawn hnuah man an ni.

Nazir hi Ganga khua aṭangin man a ni a, hemi ni vek hian Abotani Colony aṭangin Sabir Ahmed Mir chu an man leh nghal a ni. Tualchhung journalist pakhat sawi danin, an pahnih hian Arunachal Pradesh-a sipai che vel chu Telegram channel hmangin Pakistan-a an thawhpuite an thawn ṭhin.

An pahnih hian state hi an tlawh fo ṭhin a, kum eng emaw zat liamta aṭang khan thawmhnaw zuarin district hrang hrangah an zinkual ṭhin a ni. Kibitho, Anini leh Tezu an tlawhna aṭangin sipai chet dan kimchang an zirchian hnuah Pakistan-a an thawhpuite hnen an thlen ṭhin. Thu an zawhfiahnaah Nazir Ahmad Malik chuan Sabir Ahmed Mir hian a ruai tih a sawi.

Nazir hian sipai awmna hmun thlalak leh video ṭhahnem tak a lakhawm a, Pakistan-a an thawhpuite hnenah a thawn tih hriat chhuah a ni a, Sabir nen pawh an inbepawp nasa hle tih a chhuitute chuan an hre chhuak bawk. An pahnih hian kumin April thla khan state hi an lo thleng tawh a ni.

Itanagar superintendent of police Jummar Basar chuan, ramchhung himna tichhe thei thil a nih avangin leh, chhuizuina neih chhunzawm tura harsatna thlen thei a nih avangin an thiltih kimchang chu media-a puangzar tam lo turin a ngen.