Manipur : President-in Imphal thleng

President Droupadi Murmu chuan ni hnih cham turin nimin chawhnu dar 1 khan Manipur khawpui Imphal a thleng. President hi Manipur sorkar senior official-ten airport-ah an lo hmuak a ni.

President hian Manipur a thlen hnu lawkah Mapal Kangjeibung-ah polo exhibition match a chhim a, tlai lamah state sorkar buatsaihah City Convention Centre, Imphal-a hun hmannaah a tel bawk. Murmu hian project thawh tur hrang hrang lungphum a phum bakah, project ṭhenkhat a hawng bawk.

Vawiinah Nupee Lal Memorial Complex-a Nupi Lal Day vawi 86-naa hun hmanah President hian a telpui dawn. Imphal-a ceremony hman zawhah, Senapati district-a mipui vantlang inkhawmah thu a sawi ang. He hunah hian tlang district-a hmasawnna kalpui mek tihchakna atan project eng emaw zat a hawng bawk ang.

President Murmu-i'n Manipur a tlawh hi sorkar laipui leh Manipur inzawmna tihnghehna atana tih niin, state dinhmun ngelnghet, hmasawnna, leh state-a history leh culture identity hriatpuina tura hmalakna kalpui mek zinga mi a ni.