Assam : Zirlai 3,10,031 hnenah bicycle sem ṭan

Assam sorkarin state puma bicycle sem programme chu Ningani khan hawngin, chief minister Himanta Biswa Sarma chuan hawnna inkhawmah hian Dibrugarh-a pawl 9 zirlaite hnenah cycle a hlan nghal.

He hmalakna hi zirlaiten veivahna an tlakchham avanga sikul an chawlh phah ṭhin tih tlemna tur niin, sorkar leh provincial secondary school, tea garden model school leh state hmun hrang hranga zirna ina zirlai 3,10,031 hnenah bicycle hi sem a ni ang.

Dibrugarh High School Playgound-a hun hmana thu a sawiah, CM Sarma chuan zirlaiten veivahnaa harsatna an tawh ṭhin sutkian sak an tum tih a sawi. Zirlai 6% dawn chuan veivahna lama harsatna an tawh avangin, kum nga chhung sikul an kal hnuah an chawlhsan tih a tarlang. Cycle sem chu a bik takin thingtlang leh hmun kilkhawra chengten an chhawr ṭangkai lehzual dawn a ni, a ti.

Sarma chuan zirlaiten awlsam zawka veivahna an neih theih chuan, sikul an kal ṭha dawn a,sikula inziaklut an pun dawn bakah, sikul chawlhsan an tlem phah dawn a ni, a ti. Assam education system thuam chakna turin hmalak a ni dawn bawk a, pawl 10 zirlaite chuan thla tin Rs 300 an dawng dawn tih a sawi.

Hei bakah sorkar chuan HSLC (Class 10) pass chhuak tawh, zirna sang chhunzawm zel turte chu an admission Rs 10,000- Rs 12,000 a tumsak dawn tih a tarlang. CM chuan zirlai hmeichhia puihbawmna kalpui mek, 'Nijut Moina' pawh sawilangin, mipa tan Babu Asoni scheme kalpui a ni dawn tih a puang bawk.