Arunachal Pradesh : Lirthei chesuala thi chhungte hnenah zangnadawmna pe dawn

Prime minister Narendra Modi chuan tun kar tir lama Arunachal Pradesh-a Anjaw district-a lirthei chetsualna thlenga Assam mi 14 an thi chu pawi a tih thu sawiin, Prime Minister’s National Relief Fund (PMNRF) aṭangin mitthi chhungte hnenah Rs nuai 2 ṭheuh pek an ni dawn tih a social media X-ah a tarlang.

Assam chief minister Himanta Biswa Sarma pawhin nunna chan mi 14-te chu Assam-a Tinsukia district-a cheng an nih thu leh, pawi a tih thu a social media X-ah a tarlang ve bawk. Sarma chuan passenger pasarih an awmna chin la hriat loh zawn hna thawk tur leh, Arunachal Pradesh rescue team pui tur tirh an ni tih a sawi bawk.

Lirthei chetsualna hmun hi Anjaw district-a Hayuliang-Chaglagam road a ni a, truck pakhatin passenger eng emaw zat a phurh chu luiah a tlan liam pui a ni. Ningani chawhma dar 11 vela tualchhung thuneitute'n tawhsual tawk an awm tih hriattirna an dawn hnu lawkah chhanchhuah hna thawh ṭan nghal a ni.

Tinsukia deputy commissioner Swapneel Paul chuan, official-te'n Anjaw leh Tezu DC-te an biak tawh thu sawiin, tun dinhmunah ruang 14 hmuh an ni tawh a, nungdamin pakhat chhanchhuah a ni tih a sawi. Circle officer leh police team-te chu chetsualna thlenna hmunah hian tirh an ni bawk.