Tripura : CPI-M-in intih hmingchhiatna thubuai thehlut

Tripura-a Leader of Opposition (LOP) leh CPI-M Polit Bureau member, Jitendra Chaudhury chuan Ningani khan chief minister hlui leh BJP MP ni mek, Biplab Kumar Deb-a'n eptu party kalphung dik lo takin a sawi tih tarlangin, intih hmingchhiatna thubuai (defamation suit) an thehlut tih a sawi.

Chaudhury chuan kumin kum tir lama Gandhigram-a sakhaw thila inkhawm neihah, Deb chuan CPI-M chu Udaipur-a Tripura Sundari Temple (Matabari)-a donation hmang dik loah a puh tih a sawi. Party chuan hemi chungchangah hian thuchhuah siamin, hetianga dawta inpuhna avang hian Deb chu ngaihdam dil turin an lo hriattir tawh bawk.

Deb hian lehkhathawn eng emaw zat leh hriattirna a chhan loh avangin, dan anga hmalak mai loh chu tih theih dang an nei lo tih Chaudhury chuan a sawi. Deb-a'n a puhna chu thu dik lo, leh sakhua tana rilru natthlak tak a ni tih Chaudhury chuan sawiin, hetianga intih hmingchhiatna hi CPI-M tihmualpho leh sakhaw zah lohna a nih thu a sawi. An party chuan thuthang dik lo tak chu ngawihbopui an tum lo tih tarlangin, an hmingṭhatna humhim turin court hnen an thlen tih a sawi a ni.