Arunachal Pradesh : Governor-in BRO Chief hmu

Arunachal Pradesh governor KT Parnaik chuan Border Roads Organisation (BRO) director general Raghu Srinivasan chu Lok Bhavan, Itanagar-ah hmuin, inkalpawhna kawng leh ramri infrastructure endik bakah hmachhawp awmte an sawidun.

Meeting-ah hian hmun hla leh tlawhpawh harsaa kawng thuam chak, enkawl chhunzawmna pek leh a rang lama kawng chhia siamṭhatte an sawi bawk a ni. Governor chuan Arunachal Pradesh mipui aiawhin BRO-in kawng pawimawh 10 leh, Arunank, Udayak, Vartak leh Brahmank project hnuaiah lei 22 a dawhsak avangin lawmthu a hrilh. Heng project pawimawhte hi kumin December 7 khan defence minister Rajnath Singh chuan virtual-in a hawng a ni.

Governor chuan infrastructure project-te hian sipai chetvelna kawngah a pui dawn a, hmun hla leh tlawhpawh harsaa beihpui thlak a tiawlsam dawn tih a sawi bawk. Hei bakah inkalpawhna ṭha chuan tualchhung mipui socio-economy a tichak dawn a, state pumah khawsak a chawikang dawn a ni, a ti.

BRO chu thingtlang khaw hla tak taka medical camp an buatsaih ṭhin vang leh, kawng siam hna thawk ṭhinten an fate an dahna tur Play & Learning Room an siamsak avangin Governor chuan lawmthu a hrilh. Ram venhim mai bakah mipui hamṭhatna tura BRO hnathawh chu ropui a tih thu a tarlang bawk. BRO hruaitu chuan project hnathawh mek hmasawn dan leh harsatna an tawhte a lo hrilh a, kawng leh infrastructure changtlung a awm theihna turin theihtawp an chhuah tih a lo hrilh bawk a ni.