Sikkim : Assembly-in hnam 12 hnenah ST status pek remti

Sikkim Legislative Assembly chuan December 12 khan Sikkim State High-Level Committee report hnuhnung bera resolution pawimawh tak an siam pakhat chu pawmin, hun rei tak chhung Scheduled Tribe list-a la awm lo, state leilung fate zinga hnam 12 chu Scheduled Tribe (ST) status pek a remti.

Chief minister Prem Singh Tamang chuan, thutlukna chu rorelna dik leh harsatna tawk mipuite tana hmalakna lian tak a nih thu sawi. State leilung fate chu ST-a dah tur leh an dikna chanvo humhalh tura hmaih bik an awm lohna turin sorkarin theihtawp a chhuah tih a tarlang bawk. Sorkar hmasa hnuaiah kum tam tak chhung chu he buaina hi chinfel a nih loh thu a sawi. A rorelna hnuaiah nasa taka hma lak a nih thu sawiin, November 2024 khan thubuai zirchiang turin ram chhunga mithiamte awmna high-level committee din a ni, a ti.

Chief Minister chuan, committee-in rawtna an thehluh hmain zirchianna leh inrawnkhawmna nasa tak an nei tih tarlangin, report hi Assembly-ah theh luh a ni a, hnam 12-te'n tribal status an dilna tihkhawtlai tawh chu tihhlawhtlin a ni ta tih a sawi.

Assembly pawmpuinain report hi sorkar laipui ngaihtuah turin thawn a ni ang. Hemi chungchangah hian Tamang chuan committee member, subject expert-te leh state leilung fa aiawh-te'n thawh hona ṭha an neih avanga an hlawhtlinna a tarlang bawk.