Manipur : Meitei leh Kuki BJP MLA-ten high-level meeting nei

Manipur-a Meitei leh Kuki Bharatiya Janata Party (BJP) MLA-te chu New Delhi-a party hruaitute high-level meeting buatsaihah an tel. Sawi honaah remna leh muanna siam, nunphung pangngaia kir leh an state puma harsatna awm loa inkalpawh theih chungchangte an sawi.

Pathiannia meeting hi tlai dar 5:30 aṭanga zan dar 7:30 thleng neih niin, Manipur-a BJP MLA-te leh sorkar laipui hruaitute an tel a ni. BJP National general secretary (Organisation) B.L. Santosh leh BJP hmarchhak in-charge Sambit Patra-te an tel bawk. Meeting-ah hian BJP MLA 42 an tel a, an zingah hian Manipur Legislative Assembly speaker Th. Satyabrata leh chief minister hlui N. Biren Singh-te pawh an tel. Kuki BJP MLA pasarih zingah Nemcha Kipgen (Kangpokpi), Ngursanglur Sanate (Tipaimukh), L.M. Khaute (Churachandpur), leh Letzamang Haokip (Henglep)-te an tel a ni.

Party hruaitute chuan Manipur-ah remna leh hmasawnna kawngah hmalakna a awm theihna turin party MLA-te inpumkhat a ṭul thu an sawi. Tlang leh phai inkarah zalen leh him taka inkalpawhna siam chu ngaih pawimawh a ni bawk.

Meeting-ah hian sorkar thar din chungchang chu ngaih pawimawh ber a ni lo tih an sawi. Sorkar laipui thuneitute chuan sorkar thar din chu state pumah zalen taka inkalpawh theih a nih hunah ngaihtuah ṭhat a ni dawn tih an tarlang.