Assam: AASU-in lungawi lohna lantir

Assam-a All Assam Students' Union (AASU), Gauhati University leh University Law College unit-te chuan nimin, December 15 zing dar 6 aṭang khan campus chhunga Shaheed Bedi (Martyrs’ Memorial) sak ṭhat phutin darkar 12 chhung chaw ngheiin lungawi lohna an lantir.

Shaheed Bedi hi kum kalta May 27 khan thlipui leh ruahsur nasain a tichhia a, tun thlenga sak ṭhat a la nih loh avangin zirlaite leh alumni-te chuan lungawi lohna an lantir ta a ni. AASU chuan vawi eng emaw zat university thuneitute hnenah an lo thlen tawh a, hmalakna mumal a awm lo tih an tarlang.

Zirlai pawl hruaitute chuan Vice-Chancellor pahnihin office an luah hnuah leh, campus hmasawnna project dang eng emaw zat thawh zawh a nih hnuah pawh an ngenna chu ngaihthah a la ni chhunzawm zel tih an sawi. Hun rei tak ngaihsak a ni lo chuan university chanchina thil pawimawh leh hlu tak humhalh tumna a awm lo tih a tichiang hle a ni, an ti.

AASU unit-te chuan chaw ngheia lungawi lohna lantir chu Martyr memorial a rang lama sa ṭha tura an phutna a ni tih an sawi. Program hmang hian mipui ngaihven leh, Assam chanchina chhinchhiah tlak humhim tura thawh hona tihchak an tum tih an tarlang. University thuneitute chuan nimin vek khan Shaheed Bedi sak ṭhatna tur lungphum phum a ni dawn tih an puang ve nghal a ni.

Zirlai pawl chuan university thuneitute chu a rang lama sak ṭhat hna thawk turin leh, tihkhawtlai a nih chuan lungawi lohna leh buaina nasa zawk a thleng thei tih an vaukhan.