Meghalaya : Plastic pollution venna atan green deposit scheme siam

Meghalaya sorkar chuan an state-ah khualzinten an hmun tlawh hrang hrangahte plastic bottle an ken leh hnutchhiah ṭhin avangin, plastic pollution venna atan Pathianni khan 'green deposit' scheme a siam.

Green Deposit Scheme hi khualzin tlawh tam hmun, plastic bottle an hnutchhiahin lui, ramngaw leh ecosystem derthawng laite a tihbawlhlawh zualna, Cherrapunjee, Dawki leh Living Root Brige-ah hman a ni ang. Heng hmun tlawhtu khualzin, plastic item - bottle leh polythene kengte chuan entry point-ah Rs 100 an deposit zel a ngai dawn. An kir lamah an plastic item ken luhte an ken kir leh vek a, a paihna tur bika siama an paih chuan a pawisa dah hi an la kir leh thei ang. Meghalaya hi khualzinin an tlawh nasat avangin plastic paih hnawk pawh a tam chho hle a ni.

Official-te chuan he scheme hi plastic hmanrua, leilunga paih darh venna tur, an ram leilung humhalhna tura hmalakna a ni tih an sawi. Hemi hmang hian tualchhung mite leh khualzinte chuan leilung humhalhna kawngah hna ṭha tak an thawk dawn a ni, an ti.

State sorkarin bawlhhlawh sawngbawl dan mumal zawk leh, plastic lam khuahkhirhna dan khauh zawk a siam hnuaiah heng hmalakna hi a kalpui a ni. Meghalaya High Court chuan a hmain vawi khat hman plastic, micro 120 hnuai lam hman khapna chu kalpui turin state sorkar hi a lo hriattir tawh bawk. Sorkar chuan green deposit scheme kalpui dan leh, a result te a thlithlai reng dawn a, a hlawhtling nia a lan chuan hmun dangah pawh hman chhunzawm zel a tum.