Meghalaya : CM-in City Beautification Drive hawng

Meghalaya chief minister Conrad K. Sangma chuan Mawlai-a My City Campaign hnuaiah City Beautification Drive a hawng. He hmalakna hmang hian Dorbar Shnong institution nena thawk hoin, bawlhhlawh awm lohna leh chenna hmun thianghlim siam tum a ni.

Programme peng pakhatah Chief Minister chuan Nilaini khan beautification grant, Rs 75,000 - Rs 1,00,000 chu veng 60 hnenah a sem a, hei hi vantlang hmun tihchangtlunna tura khawtlang hruaitute hmalakna puihbawmna tur a ni. Sangma chuan Mawlai Mawroh-ah CCTV surveillance system a hawng bawk. Mawlai Bridge, Iewrynghep-a Mawlai Mawroh leh Mawlai Iewrynghep hnuai hmun hrang hrangah lemziak hmangin beautification drive kalpui a ni bawk.

Hawnna inkhawma thu a sawiah, CM chuan programme chu 'CM Connect Event' a nih thu sawiin, sorkar leh mipui inbiakpawhna leh thawh hona ṭha siamna tur a ni tih a tarlang. Inrelbawlna ṭha awm tur chuan inbiakpawhna neih a pawimawh tih sawiin, sorkar leh mipui inkarah lungrual taka thawh hona ṭha a awm chuan, a ṭha lama inthlak danglamna a thleng thei a ni, a ti.

Mawroh-a CCTV network a hawnnaah, Chief Minister chuan hmun 25-a network siam hna thawh mek pawh nakkum January thlaah peihfel hman a nih a beisei thu a sawi. 'Paint My City' campaign-ah thu sawi bawkin, fund chu vantlang stakeholder-te hnenah cheque hlan a nghal a ni.