Assam : PM-in ammonia-urea plant lungphum phum

Prime minister Narendra Modi chuan nimin, Pathianni khan Assam tlawhin, Dibrugarh district-ah brownfield ammonia-urea plant, Rs vbc 10,601 senna tur lungphum a phum.

He plant aṭang hian Assam Valley Fertilizer and Chemical Company Ltd (AVFCCL) chuan kum khatah urea metric ton nuai 12.7 a siam chhuak thei dawn a, kum 2030-ah hman ṭan tura ruahman a ni. Kumin July thla khan Dibrugarh district-a Namrup-ah AVFCCL hi dah ṭan a ni. Brahmaputra Valley Fertilizer Corp Ltd (BVFCL)-a hmun awmsaa plant thar siam chu kumin March thla khan Union Cabinet-in a lo pawmpui tawh a ni.

AVFCCL hi July thla khan Assam sorkar, Oil India, National Fertilizers Limited, Hindustan Urvarak & Rasayan Ltd leh BVFCL-te thawh hona hnuaia din a ni. Official-te chuan unit thar hian India hmarchhak leh khawchhak lama fertilizer mamawh phuhruk kawngah hmun pawimawh tak a chan ngei an beisei thu an sawi.

PM-in Brahmaputra cruise zirlaite kawm

Prime Minister hian nimin vek khan ‘Pariksha Pe Charcha’ programme-ah Brahmaputra River cruise zirlaite a kawm. State-a sikul hrang hrang aṭangin zirlai 25 event-ah hian an tel a ni.

Zirlaite hi district hrang hrang; Kamrup Metropolitan, Morigaon, Dibrugarh, Cachar, Sribhumi, Baksa, Dima Hasao, Kokrajhar, Golaghat, Karbi Anglong, leh Nalbari aṭangin an tel. Sorkar sikul, residential, leh mimal enkawl sikul aṭanga zirlaite an ni. Chief minister Himanta Biswa Sarma chuan Prime Minister-in kum kaltaa Kaziranga a tlawh chuan tourism a thuam chak tih sawiin, tuna a tlawhna pawh hian river cruise tan nghawng ṭha a neih a beisei thu a sawi.