State-ah dan bawhchhiatna nasa takin a tlahniam : Tripura CM

Tripura chief minister Manik Saha chuan Inrinni khan BJP sorkarin dan leh thupek a ngaih pawimawh thu sawiin, kum 2023 nena khaikhinin kumin November thla thlenga state-a dan bawhchhiatna thleng a tlahniam nasa hle tih a sawi.

Kum 2023-a pawikawihna leh dan bawhchhiatna thubuai 1,385 aṭangin, kuminah November thla thlenga thubuai awm zat chu 753-ah a tlahniam tih a tarlang.

Chief Minister chuan inrelbawlna ṭha taka kalpui turin police station-te chuan mawhphurna sang tak an nei tih a sawi. Service delivery system chu police station level aṭanga ṭan a nih thu a sawi bawk. Tun dinhmunah police station 90 leh hmeichhe police station pakua a awm tih sawiin, tunhmain politics a inrawlh ṭhin avangin inkaihhruaina a tibuai ṭhin a ni, a ti. Hetiang thil hi tihtawp a ṭul tih tarlangin, OC (Officer-in-Charge)-te a biak ngai loh thu leh, police inkaihhruainaah a inrawlh ngai lo tih a sawi.

Police-te chu zah tur an ni a, uniform chu an mawhphurhna chhinchhiahna a ni, a ti. Officer-te chu an hnathawh ṭhat dan chhinchhiah a nih thu leh, report leh feedback hmangin SP leh DM-te nen kar hnih danah review meeting a neihpui ṭhin tih a sawi bawk. OC-te chu FIR theh luh uluk taka vil turin a chah. Counselling neih a pawimawh thute, thubuai theh luh tihkhawtlai a nih lohna atan a hun taka chargesheet theh luh a pawimawh thute leh, police zingah taksa hriselna vawn ṭhat a pawimawh thu a sawi bawk.