Hmarchhakah CAB duh lohna a zual zel

Tripura-a rorellai, Bharatiya Janata Party (BJP) thawhpui Indigenous People's Front of Tripura (IPFT) chuan vawiin hian Citizenship (Amendment) Bill duh lohna lantirin  darkar 12 awh nawrh an huaihawt dawn. IPFT hian December 2 khan Delhi-ah CAB duh lohna hi an lo lantir tawh bawk. 

Agartala-a media mite an kawmnaah, IPFT hruaitute chuan Tripura Tribal Areas Autonomous District Council (TTAADC) area-ah zing aṭangin nawrh hi huaihawt a ni dawn tih an sawi. IPFT Assistant General secretary leh party thupuangtu Mangal Debbarma chuan December 2 khan Delhi-a Jantar Mantar-ah CAB duh lohna leh, TTAADC are tana state hran an phutna lantirin nawrh an huaihawt tawh bawk tih a sawi. 

Party General Secretary leh Tripura Forest and Tribal Welfare Minister Mevar Kumar Jamatia kaihhruaiin IPFT palaite chuan union home secretary Ajya Kumar Bhalla hmuin, an thil phut chungchangah memorandum pawh an lo thehlut tawh a, Prime Minister, Home Minister, Tribal Affairs Minister leh DoNER (Development of North Eastern Region) Minister office-ah an thehlut tawh bawk a ni. 

Joint Movement against Citizenship Amendment Bill (JMCAB) pawhin vawiin aṭang­in Tripura state pumah CAB do­dalna lantirin tiam chin awm loa nawrh huaihawt an tum. JMCAB hi CAB duh lotu, tirbal party leh indigenious social organisation hrang hrang intelkhawm an ni. 

JMCAB chuan CAB-in Tri­pura-a tribal area chauh a huam tel dawn lo nia sawi chu duh loin, state pum huam tel tir loh an phut. JMCAB chuan lungawi lohna lantir nan hian vawiin aṭangin kawngpui leh rel kawngte an dang dawn tih a sawi. 

Assam-a All Chutia Students' Union (ACSU) pawhin vawiin hian Citizenship (Amendment) Bill duh lohna lantirin darkar 12 awh nawrh huaihawt an tum bawk a ni. ACSU general secretary Mahen Bora chuan Assam mi­puite chu sorkar laipuiin a duhdan anga a hrual tumnaah an tlawm mai dawn lo tih sawiin, CAB hi hun rei tak aṭangin sorkar laipui chuan kalpui tumin ruahmanna a lo siam tawh a ni, a ti. Union home minister Amit Shah hnenah pawh he bill an duh loh thu hi an lo hrilh tawh tih a sawi bawk. 

Hmarchhak zirlai pawl hrang hrang intelkhawm, North East Students' Organisation (NESO) chuan naktuk hian CAB duh lohna lantirin darkar 11 awh Northeast bandh huaihawt a tum bawk. Bandh hi Thawhlehni zing dar 5 aṭanga tlai dar 4 thleng neih tum a ni. 

NESO chuan Northeast bandh hi hmarchhak state hrang hrangah huaihawt a ni dawn tih an sawi a, mahse Nagaland-ah chuan Hornbill Festival neih lai a nih avangin bandh hi neih a ni ve dawn lo tih a sawi. Mahse Naga Students’ Federation (NSF) chu Governor House kawtah CAB duh lohna lantir hian an pungkhawm dawn tho a ni. 

Confederation of Meghalaya Social Organisations (CoMSO) chuan BJP kaihhruai sorkar laipuiin CAB hi a hmang lui a nih chuan Supreme Court-ah zualko an tum tih an sawi. 

CoMSO hian Inrinni khan Shillong-ah meeting neiin, Citizenship (Amendment) Bill in a huam loh tur zingah Meghalaya state pumpui chu a tel loh avangin an pawm thei dawn lo tih an sawi a ni. CoMSO hotu Robertjune Kharjahrin chuan, "CAB tibo tur hian Supreme Court-ah ngenna kan thlen ngei dawn a ni," a ti. Tribal mite chanvo humhalh sak turin Supreme Court-ah rinna an nghat tih sawiin, political party-te erawh chuan an vote hmuh theihna tur chauh ngaihtuahin, hnam tlem leh hnuaihnung zawkte an theihnghilh fo a ni, a ti. 

Kharjahrin chuan Meghalaya state pumah Inner Line Permit (ILP) system hmang tura sorar laipui an phut tur thu a sawi bawk.