Tripura : Minister-in State Road Safety Council meeting kaihruai

Tripura transport minister Sushanta Chowdhury chuan Thawhṭanni khan Secretariat-ah State Road Safety Council meeting vawi 17-na a kaihruai.

Session-ah hian Finance department secretary, Inspector General of Police (Law & Order), Food department special secretary, higher education director, director of food, traffic police superintendent leh district pariat aṭanga district magistrate-te chu virtual-in an tel bawk a ni.

Meeting-a thu a sawiah, minister Chowdhury chuan lirthei chetsualna avanga nunna chan an awm ṭhin chu mimal mai ni loin, ram pum huapa channa nasa tak a ni, a ti. Hetianga chhiatna thleng ṭhin hi chhungkaw tam tak tan sum lama harsatna leh lungngaihna thlentu a nih thu a sawi.

Meeting-ah hian Transport department hmalakna, 'Rah Bir (Good Samaritan Project' pawh sawilan niin, he scheme hnuaiah hian lirthei chetsualna avanga hliam tuar nunna chhanhimtute hnenah Rs 25,000 leh certificate hlan ṭhin an ni.

Council chuan state puma lirthei chetsualna titlem turin theihtawpin hma an la tih sawiin, awareness, enforcement leh mipui vantlang tel theihna ruahman ṭhin a ni, a ti. Minister chuan lirthei chetsualna titlem tur leh nunna chhanhim tur chuan a huhoa ṭanrual a pawimawh tih a tarlang.