Manipur : Oil pump shutdown chhunzawm

Manipur valley leh a chhehvela oil pump neituten bomb tihpuah hmanga invauna leh, pawisa inchhuhsak tumna thleng ṭhin chungchanga state thuneitute ngaihsakna an dawn loh avangin nawrh an huaihawt mek chu chhunzawm zel niin, oil pump-te pawh shutdown a ni.

Pathiannia thuchhuah an siamah, Manipur Petroleum Dealers Fraternity (MPDF) chuan kumin December 10-a Manipur Governor hnena memorandum an theh luh chhanna an dawn loh avangin shutdown chhunzawm zel a ni tih an sawi. Memorandum-ah hian dealer-te himna turin a rang lama hma lak an ngen.

Fraternity chuan an dinhmun chu a hlauhthawnawm hle tih sawiin, hetih rual hian hmalakna a awm loh avangin dealer-te chuan nawrh huaihawt mai loh chu tih theih dang an nei tawh lo tih an sawi. Sorkarin a rang lama hma a la lo a nih chuan fuel outlet-te chu khar chhunzawm zel a ni dawn tih an tarlang. Mipui tana harsatna an thlen chu pawi an tih thu sawiin, fraternity chuan dawhtheihna leh thlawpna pe turin a ngen nghal bawk.