Meghalaya : Job quota report kg 200-a rit a tling

Meghalaya chief minister Conrad Sangma chuan expert committee-in state job reservation policy chungchanga report a siam chu kg 200-a rit a tling tih a sawi. Report hi mipui hriatah puanzar a ni thuai dawn tih a sawilang bawk.

Chief Minister chuan report an siam hi phek 4,000 - 5,000 vel a tling a, flight-a pawh phurh theih a nih loh avangin a phur tur motor hran ngaihtuah a ngaih thu a sawi a ni.

Hetih lai hian eptu pawl,Voice of People's Party (VPP) chuan CM thusawi chu thil mak tak a ni an ti a, Khasi Students' Union pawhin report rih zawng CM sawi chu awih har an ti bawk. Hemi rual hian expert committee report chu mipui hriatah tichhuak thuai turin an phut.

CM chuan report hi official-ten an ennawn leh mek tih a sawi a, uluk taka ennawn a ngaih thu leh, comma dahna ringawt pawhin thil a tihdanglam daih theih thu a sawi. Official-ten an ennawn zawhah cabinet-ah thawn a ni leh ang.