Sikkim : 2025-ah khualzin tlawhtu nuai 17 awm

Sikkim sorkarin Nilainia official data a tihchhuahah, kum 2025 chhungin an state tlawhtu khualzin nuai 17 chuang an awm. Ram dang aṭanga tlawhtu, foreign tourist hi tlahniam mah se, India ram chhung hmun dang aṭanga khualzin an neih hi a kum hmasa aiin 82,000 in an tam a ni.

Kum 2024 khan Sikkim-ah hian foreign tourist 84,710 an awm laiin, nikumah 71,710-ah a tlahniam. Mahse, ram chhung hmun dang aṭanga tlawhtu hi kum 2014-ah 15,40,421 niin nikumah 16,35,650-ah a pung thung.

Tourism Department Additional Chief Secretary C.S. Rao chuan ram dang mi khualzin an tlakhniamna chhan hi an kawngpui a chhiat nasat vang nia an ngaih thu a sawi a, nikumah tuilianin an kawngpui a tichhe nasa hle a ni. Kawngpui ṭha lo chuan ram danga zin luh tumteah nghawng a nei lian hle a ni, a ti. Hemi rual hian ram dang khualzin tam zawk hip luh tumin hmasawnna hna thawhna kawngah theihtawp chhuah mek a nih thu a sawi. An state kawngpuite a ṭhat a, a bikin National Highway-10 chu a ṭhat reng theih chuan kuminah an state tlawhtu khualzin nuai 20 vel an neih theih an beisei tih a sawi.

Sikkim-ah hian January 4 aṭang khan vur a sur a, kum dang aiin a sur tlai niin an sawi. Vur tlak leh sur hunlai hian tlawhtu an tam ṭhin hle. State khawpui, Gangtok aṭanga km 120-a hla, Lachung khua chu vurin a khuh nasat ṭhin avangin thlaik laia hmun tlawh nasat a ni ṭhin. Kumin pawh tlawhtu an tam hle a, lodge leh hotel-te pawh a lun hle a ni.