Meghalaya : NEHU in-charge Vice-Chancellor ruat thuai turin ngen

Meghalaya-a North-Eastern Hill University (NEHU) stakeholder-te chuan Ministry of Education-ah NEHU inrelbawlna kawnga buaina awm chinfel a nih theihna turin in-charge Vice-Chancellor ruat thuai turin an ngen.

University-a pawl hrang hrangte chuan Ministry hnenah joint memoradum an theh lut a, Vice-Chancerllor tur ruat fel a nih hma chu university-a professor senior ber, Prof. Saroj Kanta Barik chu charge lak tir rih mai turin an ti. Memorandum-ah hian NEHU Students’ Union, Teachers’ Association, the Non-Teaching Staff Association, Meghalaya Tribal Teachers’ Association (NEHU unit) leh Khasi Students’ Union, NEHU aiawhten an hming an ziak an ni.

NEHU Vice-Chancellor Prabha Shankar Shukla chu Shillong headquarters-ah ni 415 a awm tawh lo tih sawiin, hruaitu mumal nei loin university chu hun rei tak a awm tawh a ni, an ti. Hetianga a hotu ber a awm loh reng vang hian inrelbawlna lamah nghawng a nei a, NEHU headquarters chu Vice-Chancellor emaw, Acting Vice-Chancellor emaw pawh nei loin a awm a ni,tin an tarlang. Hei hian inrelbawlna bakah zirna lam thlengin a nghawng a, thutlukna siam turte tihkhawtlai a ni fo chuan scholarships, fellowships leh research project thlengin a tibuai thei dawn tih an sawi bawk.