Assam : Eptu party 5-in BJP lakah complaint theh lut

Assam-a eptu party pangate chuan rorellai, Bharatiya Janata Party (BJP) chu state electoral roll aṭanga voter dik tak eng emaw zat paih tuma ruahmanna siamah puhin, Guwahati-a Dispur police station-ah complaint an theh lut.

Complaint thehlutte hi Congress, Raijor Dal, Communist Party of India (Marxist), Communist Party of India (Marxist-Leninist) leh Assam Jatiya Parishad te an ni. Assam BJP president leh MP Dilip Saikia chu he thilah hian an inrawlh tih sawiin, party MLA-te chu voter list aṭangin BJP ni lote paih tura a hriattir thu an tarlang.

Assam hian kumin March-April velah assembly inthlan an neih rin a ni a, electoral roll ennawn, special revision neih mek a ni. Nikum December 27 khan Election Commission chuan special revision kalpuina hnuaia in tina voter-te endik an nihnaah Assam-a voter list-a chuang zinga nuai 10 chuang chu paih tura tih an nih thu a lo sawi tawh a ni. Final list hi February 10 hian an tichhuak ang.

Election Commission thupek anga ram chhunga state leh Union Territory 12-ah roll ennawna, special intensive revision (SIR) kalpui a nih laiin Assam-ah erawh special revision kalpui tura tih a ni thung. November 20 - December 20, 2025 chhung khan in tina voter endik hna hi kalpui a ni a, he hunah SIR in a phut anga document enfiahte erawh telh a ni ve lo.

Eptu party-ten complaint an thehluhah, Saikia chuan January 4-a health minsiter Ashok Singhal nena online meeting an neih ṭumin, BJP ni lo voter-te list aṭanga paih tur hian a ti niin an sawi. Police-te pawh meeting footage hi la a, dik lo taka thiltitute chu thubuai siamsak ngei turin an phut tih an tarlang.

Raijor Dal chief leh Sivasagar MLA Akhil Gogoi chuan a hranin Election Commission hnenah lehkha pawh a thawn bawk a, January 4-a online meeting chungchang chu chhui chiang turin a phut. Constituency pakhatah BJP ni lo voter 10,000 zel paih tura a tih thu sawiin, an thusawi chhuichiang tur hian digital record leh an inbiakna te pawh lakhawm vek turin a phut a ni.

BJP chuan eptu party-te puhna hi a pha thung. Party thupuangtui Jayanta Kumar Goswamin chuan Golaghat district-a sorkar ram luahte chhuahtirna, eviction drive neihnaa Muslim mi 11,000 chhuahtir an nih chungchang chu Gogoi hian a hresual niin a sawi ve thung.