Sikkim MP-in Union Minister hmu

Sikkim MP Indra Hang Subba chuan kar liam ta Zirtawpni khan Union Minister of State for Road Transport and Highways, Harsh Malhotra hmuin, an state-a national highway project thawh mek chungchang a sawipui.

Subba chuan NHIDCL-in an state-a kawngpui siam hna an thawh mek, a bikin Gyalshing district chhunga National Highway-510 an siama Packages V leh VI hnuaia hna thawh chu a muang hle tih Union Minister a hrilh. He project hi an state-a inkalpawhna atan leh economy lam tihhmasawnna atana a pawimawh dante a sawilang a ni. Union Minister hnenah hian hna thawh mekah harsatna leh bahlahna awm ṭhinte chu ngaihven pui a, rang taka hna thawha a hun taka project hi zawh a nih theihna tura ngaihtuahpui turin a ngen.

Malhotra pawhin MP in harsatna a thlente chu a lo ngaihven tur thu leh, an ministry chuan Sikkim leh Himalayan region danga kawngpui ṭha zawk siam tura theihtawp a chhuah zel tur thu a sawi bawk.