Hmarchhak hmun hrang hrangah CAB duh lohna lantir zel

BJP kaihhruai sorkarin nimina Lok Sabha-a a pharh Citizenship (Amendment) Bill duh lohna chu hmarchhak bialah lantir chhunzawm a la ni zel a, nimin pawh khan hmun hrang hrangah bandh huaihawt a ni tawh a, vawiin pawh hian NESO hmalakna hnuaiah hmarchhak state tinah bandh huaihawt chhunzawm a la ni dawn.

Assam khawpui Guwahti-ah chuan mi tam takin kawng zawhin CAB duh lohna hi an lantir a, Scheduled Tribe (ST) status OBC community paruk - Chutia, Matak, Moran, Koch-Raj­bongshi, Tai Ahom, leh Tea Tribe-te hnena pek an phut tel bawk. 

Assam state chhung khawchhak lama awm Sivasagar-ah chuan nimin khan Citizenship (Amendment) Bill duh lohna lantirin total bandh huaihawt a ni a, mipuiin an thlawp ṭha hle. Sivasagar-a bandh hi All Assam Chutia Students’ Union, All Moran Stu­dents’ Union leh Greater Assamese Yuba Manch-te huaihawt a ni a, band thlawptu mi tam tak chuan kawngpuiah motor ke an hal nasa hle bawk.

Duh lohna lantirtute hian CAB an duh lohna an lantir mai piah lamah hian BJP duh lohna thute an auchhuahpui a, Modi sorkar dodalna leh Sonowal-a sorkar duh lohna thuziakte an keng a ni. Pawl pathum nawrh huaihawt hi sumdawng mite pawhin an thlawp ṭha hle a, dawr an khar vek a ni. Kawngah lirthei tlan hmuh tur a tlem hle a, Assam State Transport Corporation (ASTC) bus-te pawh an ding bawk.

Tripura-ah chuan  Indigenous People’s Front of Twipra (IPFT)-ten Tripura Tribal Areas Autonomous District Council (TTAADC)-ah darkar 12 chhung bandh an huaihawt a, zing dar 6 aṭangin bandh hi ṭanin, tribal pawl hrang hrangin forum an din Joint Movement Against Citizenship Amendment Bill’ (JMACAB) pawhin tiam chin awm loa bandh huaihawt an tum thu an puang bawk.

Helna bansan pawl Tripura United Indigenous People’s Council (TUIPC) pawhin darkar 50 chhung CAB duh lohna tur hian bandh an ko bawk a ni. Tripura-ah hian political party leh civil society tam ber chuan CAB hi an duh lo a, hetihlai hian tribal area ni loah chuan bandh hian nghawng a nei lem lo. BJP-in sorkarna a siampui IPFT hian national highway leh rel kawngte an dang a ni.

Meghalaya Governor, Tathagata Roy chuan nimin khan khawi state sorkar mahin dan ang thlapin Citizenship (Amendment) Bill chungchangah ngaihdan an siam thei lo tih sawiin CAB dodal chu thil ṭul a tih loh thu a sawi.

"Constitution-a Citizenship Amend­ment Bill(CAB) dinhmun chungchangah hian 7th Schedule to the Constitution-a Union List Entry 17-na hnuaia a inziah angin, khua leh tui nihna hi sorkar laipui buaipui tur a ni. Hemi a nih avang hian khawi state sorkar mahin dan angin CAB chungchangah ngaihdan an nei thei lo. Political party leh mimal erawh chuan an nei thei," a ti.

Pakistan-a Hindu leh minority community-te tihduhdah an ni tih leh India rama tlanchhe tura nawr luih an ni tih hi tunge pha thei. A tuar nasa berte chu kan mite, East Bengal Hindu-te an ni, tih a sawi. Citizenship (Amendment) Bill chu a thlawp thu sawi chhunzawmin, Bengal-a Muslim awmte chu 1951 aṭang khan 20% aṭanga 30%-a an pun tawh thu a sawi a, "Secular-te chuan Muslim tiduhdahtute leh Hindu tihduhte chu huang khata dah an phut a maw! CAB chuan hei hi a siamṭha dawn a ni," tiin a sawi bawk. 

Meghalaya-a zirlai pawl lian ber Khasi Students’ Union (KSU) chuan nimin khan CAB chungchangah hian Central Executive Council (CEC) meeting a ko. KSU CEC meeting hian KSU office-ah nimin chawhnu lamah khan CAB chungchang meeting hi an ko a, hetih mek lai hian Hynñiewtrep Youth Council (HYC) chuan Meghalaya Governor chu CAB chungchanga a thusawi vanga bang tura an duh thu an lo aupui ve mek bawk.

HYC president, Robertjune Kharjahrin chuan Constitution-in a duh angin Go­vernor chu Council of Ministers thu­rawn anga hma la tur a nih thu sawiin, Megha­laya sorkarin CAB a dodal laiin engtin nge Governor-in ngaihdan hrang a neih theih? tiin a sawi.

Hindu nationalist Rashtriya Swa­yamsevak Sangh (RSS) hnuaia zirlai pawl  Akhil Bharatiya Vidyarthi Parishad (ABVP) hnuaia Delhi University North East Cell aṭangin CAB duh lohna lantir nan Pathianni khan mi 12 an bang.

ABVP member-te chuan CAB thlawpna lantirin Guwahati-ah kawng an zawh a, hmarchhak miten nasa taka an dodal laia hetianga thlawpna an lo lantir hi hi duh loin, DU-a ABVP North East Cell member 12-te hi an bang ta a ni. Bangte hi an vai hian officer bearers vek an ni.