Assam: Governor-in Northeast Healthcare Conclave hawng

Assam governor Lakshman Prasad Acharya chuan January 10 khan Guwahati-ah Northeast Healthcare Management Conclave vawi hnihna a hawng. He hun hi Association of Healthcare Providers India (AHPI), North East Chapter-in thupui 'Strengthening Patient Care and Infrastructure for a Resilient Northeast' tih hmanga an buatsaih a ni.

Hawnna inkhawmah hian AHPI North East Chapter president Neelabh Majumdar, deputy director general Sunil Khetrapal, secretary Rohit Upadhyay, organising chairman JP Sharma leh healthcare lama mi thiam eng emaw zat an tel.

Governor chuan healthcare chu hriselna enkawlna atan chauh ni loin, mi tin zahawmna leh khawtlang dikna venhimna atan a pawimawh hle tih a sawi. Hei bakah a hun taka damlo enkawlna pek, awlsam leh man tlawm zawka service kalpui a ṭul tih a sawi bawk.

Sorkar laipui hmalakna zingah Ayushman Bharat leh Ayushman Bharat Digital Mission-te chu tarlangin, Governor chuan Ayushman Assam leh Chief Minister’s Jan Arogya Yojana scheme-te chu state healthcare hmasawnna atan chhawp chhuah a nih thu a tarlang. Hei mai bakah medical leh nursing college, district hospital tihchangtlun leh damlo na zualpui enkawlna atan nasa taka hmalak a ni tih a sawi bawk a ni.