Manipur: Traffic dan bawhchhiatna ṭum 18,759 thleng tawh

Manipur-a Traffic Control Police chuan lirthei dan bawhchhiatna tihtawp tuma hma an lakna kal zelah, kum hnih kalta chhungin traffic dan bawhchhiate hnenah challan 18,759 an pe chhuak tawh a, pawisa an chawi tirte hnen aṭangin Rs 5,19,19,400 an hmu chhuak tawh niin official record-ah an tarlang.

Traffic police chuan January 1, 2025 - December 31, 2025 chhungin challan 15,7000 an pek chhuah aṭangin, traffic dan bawhchhiate hnen aṭangin Rs 4,47,85,700 an hmu chhuak tawh bawk a ni. Manipur sorkar transport director, Khumanthem Diana chuan January 1, 2024 - December 31, 2024 chhung khan traffic dan bawhchhiat avangin thubuai 3,059 ziah luh a nih thu sawiin, pawisa an chawitir aṭangin Rs 71,33,700 an hmu chhuak tih a sawi bawk.

Kum kalta January 5 aṭangin kumin January 11 chhungin Manipur police-te chuan challan 77 pe chhuakin, dan bawhchhiate hnen aṭangin Rs 74,500 an hmu chhuak tawh bawk. Official-te chuan traffic dan bawhchhia an man tam berte chu lirthei khalh chunga mobile phone hman, helmet tel loa two-wheeler khalh, kum tling loa lirthei khalh, seat belt hreng lo, lirtheia sound device thawm ring tak tihchhuah leh traffic signal ngaih pawimawh loh vang a ni tih an tarlang.