Arunachal Pradesh: Assam Rifle-ten NSCN-K member 2 man

Arunachal Pradesh-a Assam Rifle-a Khonsa Battalion te chuan NSCN-K (Nikki Sumi) Over Ground Workers (OGWs) pahnih chu kumin January 10 khan an man. Arunachal Pradesh-a Tirap district-a Khonsa Market leh Deomali huam chhunga Inspector General Assam Rifles (North) hnuaia beihpui an thlaknaah mi pahnihte hi man an ni.

Security force-te chuan thu belhchian dawl leh rintlak an dawn hmangin Khonsa Market huam chhungah dan phal loh pawisa inchhuhsakna a thleng tih an hre chhuak a ni. An thu hriat bawhzuiin Khonsa Battalion, Assam Rifle leh police ṭangkawp chuan beihpui an thlak chhunzawm nghal a ni.

Beihpui an thlaknaah hian, NSCN-K (Nikki Sumi)-a OGW pakhat chu Khonsa Market-ah wine shop bula tualchhunga dawr neite hnena dan phal loha pawisa a khawn lai man a ni. An mi man hi Khechan Khetey (30), Tirap-a Old Paniduria khuaa cheng a ni. Pawisa inchhuhsakna lehkha pakhat, mobile phone, sim card leh pawisa khawn kaihhnawih lanna CCTV footage hmuh chhuah a ni bawk.

NSCN-K (Nikki Sumi) OGW pakhat zawk hi Deomali-a tualchhung dawr neite tih luihnaa pawisa a chhuhsak lai man a ni bawk. An mi man hi Danwang Maphouk, Tirap district-a Lazu khuaa cheng a ni. A kut aṭangin Rs 3,93,140, smartphone pakhat, keypad mobile phone pakhat, SIM card pathum leh handbag man a ni. An mi mante pahnih kut aṭanga an thil mante hi Khonsa Police Station-ah chhui chian tura dah an ni.