Tripura CM-in Churaibari traffic chungchang Assam CM hnenah thlen dawn

Tripura chief minister Manik Saha chuan Assam-Tripura ramri bul, Churaibari-a lirthei tlan tam leh tawt chungchang chinfel a nih theih dan ngaihtuah turin Assam chief minister Himanta Biswa Sarma hnenah a thlen dawn tih a sawi.

North Tripura district a tlawh zawha thuthar lakhawmtute a kawmnaah, Chief Minister Saha chuan Churaibari a tlawh thu sawiin, traffic chungchangah complaint eng emaw zat a dawng a, hei vang hian thuneitute chu hma la tura a hriattir thu a sawi. Assam lama checking point-ah hmun a zim avangin lirthei an inhnawh nasa thei hle a, chinfel thuai a ngai tih a sawi bawk.

Hei bakah Chief Minister chuan helai huam chhunga stone-crushing unit awm chungchanga complaint a luh thu pawh sawilangin, official-te chuan helai unit hian a chhehvelah boruak bawlhhlawh nasa tak a thlen thu an hrilh tih a tarlang. Thuneitute chuan national highway aṭanga hla zawkah stone-crushing unit siam an phut a, mahse operator-te chuan he dan hi an bawhchhia a ni, a ti.

Saha chuan unit hian environmental clearance a neih leh neih loh a zawhnaah, operator-te chuan dilna an theh lut tih an lo hrilh a ni. Enkawlna mumal a awm loh avangin boruak a tichhe zual zel tih a sawi. Thuneitute chuan uluk zawka tui pek leh, boruak humhalh kawngah ruahmanna ṭha an neih a ṭul tih a tarlang.