Manipur : Imphal-ah North-East Seminar nei

Manipur khawpui Imphal-a City Convention Centre-ah nimin, January 13 khan North-East Seminar neih a ni. Seminar thupui atan 'Resurgent Manipur: Framework for Stability & Sustained Growth' tih hman niin security official, zirlaite leh mithiamte he hunah hian an tel a ni.

Governor Ajay Kumar Bhalla chuan seminar-ah hian thu sawiin, state culture heritage hausakna, ram leilung leh sorkar hmalakna, security force hnathawh ṭhatte leh civil society hrang hrangin state hmasawnna atana hma an laknate a tarlang. Remna leh muanna, khawtlang inpumkhatna, rorelna ngelnghet leh ramria venhimna tihchak chu state hmasawnna tura pawimawh tak a ni, a ti.

Hei bakah Governor chuan Manipur chu lo neih, horticulture, puantah, kut hmanga thil siam chhuah, eco-tourism, leh infiamna lamah theihna nasa tak a nei tih a tarlang bawk. Mipui chu kutkawih hmanga eizawnna (entrepreneurship) uar tura fuihin, state-a infiammite chu ram pawna an hlawhtlinnaah a fak a, zirna, thiamna tihhmasawn, inthlunzawmna, leh ṭhalaite chawikan leh tihchak a ṭul tih a tarlang.

Seminar-ah hian plenary session vawi thum neih niin, 'Manipur at Crossroads,' Lt Gen CA Krishnan-a kaihhruai chuan state venhimna lama harsatna awmte, rorelnaa harsatna an tawhte leh regional geopolitical shift-in nghawng a neih dante a sawi a ni. Anthropologist Rami N. Desai chuan 'External Dynamics as a Catalyst for Internal Turmoil in Manipur' tih thupui hmangin ramri chungchang sawilangin, dan loa pem lut, ruihhlo network leh, state-a dan loa pemlutten leilung fate zinga nghawng a neih dante a pholang bawk.