Assam : World Bank-in project 3 thawhna tur USD mtd 680 pawm

Assam-a project lian tham leh pawimawh pathum thawhna tur, USD mtd 680 chu World Bank-in a pawm. Project pathumte hi sik leh sa na tak do theihna tura thuam chak, inrelbawlna leh service delivery tihhmasawn, zirna tihchangtlung leh state puma zirlai mtd 4 chuangten eizawnna atana thiamthil an neih theihna tura puihna turte an ni.

Nimin January 15-a World Bank-in thu a chhuahah, Board of Executive Directors chuan project hmang hian Assam-a sik leh sa na tak an tuar ṭhin puihna tur leh, khawtlang inrelbawlna tihchak bakah zirlai mtd 4 chuangte chu hnathawh tur an hmuh theihna turin thiamna pek an ni dawn tih a tarlang.

Assam Disaster Resilient Hill Roads Development Project atan USD mtd 350 sen a ni dawn a, he sum hmang hian sik leh sa na tak karah pawh hman tlak tur, road infrastructure chu tlangram leh hmun chhengchhiaah siam a ni ang. Project hian zin veivahnaa hun tam tak an hman ṭhin a tihtlem dawn bakah, mi 190,000 velin an chhawr ṭangkai dawn a ni. Hei bakah truck leh container bay, taxi leh bus terminal, electric lirthei charging point, transport leh logistics hub te a thuam chak bawk dawn a ni.

Assam School Education leh Adolescent Wellbeing Project atan USD mtd 250 pek a ni dawn bawk. He hmalakna hian state hmun hrang hranga primary sikul zirlaite zirna lamah a pui dawn a, kum 10-19 inkar zirlaite chu an hmalam huna eizawnna an neih theihna turin life-skill training pek an ni dawn bawk. Project pathumna, Assam Governance and Service Delivery Program atan USD 80 ruahman niin,hei hi finacial management system thuam chakna leh, public resource hmanna tihchangtlunna atante ruahman a ni bawk.