Meghalaya : Health Minister-in contract nurse-te hlawh pek tiam

Meghalaya health minister Wailadmiki Shylla chuan contract-a thawk nurse 288, an hlawh tihkhawtlai sakte chu tun thla chhungin pek an ni dawn tih thuthar lakhawmtute a hrilh.

Nurse-te hi November leh December thla hlawh pek an ni lo a, he thil vang hian Voice of the People Party (VPP) leh Hynniewtrep Youth Council (HYC)-te chuan sorkarin frontline worker-te a ngai pawimawh lo niin an sawi. Shylla chuan nurse-te kum khat chhung contract chu November 1 khan a tawp tih sawiin, Health Department-in staff 288-te tan an hnathawh hun chhung pawhsei a dil laiin, Personnel Department chuan 200 chauh a pawm thung a ni, a ti. Nurse-te hlawh tur chu buaipui mek a nih thu leh, tun thla chhungin pek an ni dawn tih a sawi.

Minister chuan Health department-in nurse 288-te hnathawh hun pawhsei an duh avangin siamṭhatna tur rawtna an thawn ṭha leh tih a sawi bawk.

ASHA-a hnathawk 7,000 velin honorarium leh incentive pek an nih loh avanga tiam chin nei loa nawrh an huaihawt chungchang pawh sawilangin, Shylla chuan fund pek chhuah tur chu sorkar laipuiin a pawm tih a tarlang. Minister chuan official-te chu Meghalaya-a Asha hnathawkte nen inbiakna nei turin a hriattir a, fund chu a rang thei ang bera pek an nih theihna turin hma an la mek tih a sawi bawk a ni.