Nagaland : Global Naga Forum-in eastern Naga-a buaina chhuak an dem

Nagaland-a Global Naga Forum chuan tun hnaia Myanmar chhim thlang lam, Naga chen tamna hmuna NSCN-K (Angmai Mulatonu) leh NSCN-K (Yung Aung) pawl inkara buaina chhuak chu an dem tih sawiin, buaina chhuak vang hian Naga mi leh sain nunna a chan phah a, helai bial dinhmun derthawng sa chu a tihchhiat zual thu an sawi.

Forum chuan an media cell kaltlanga thuchhuah an siamah, kumin January 9-a ralthuam hmanga inbeihna a thlen hnua January 12-a buaina a chhuah leh hnuah helai bialah hian buaina nasa tak a chhuah chhunzawm tih an tarlang. Naga mi leh sain an hnampui Naga-te an that chu thil pawm theih loh leh rapthlak tak a nih thu sawiin, ralthuam hmanga inbeihna chuan hlauhthawnna leh inṭhen darhna a siam tih an sawi bawk.

Venhimna dinhmun a ṭhat tawk loh avangin Global Naga Form chuan Layshi khuaa Naga New Year lawmna, January 14-16 chhunga neih pawh an ṭhulh. Buaina chhuak titawp thuai tur leh, ralthuam tel loa inbiakna hmanga chingfel turin an ngen a ni. Ramri biala chengte chuan inpumkhatna leh inzahtawnna an neih a pawimawh thu an sawi. Forum chuan nunna chan chhungte an tuarpui thu sawiin, hliam tuarte chu an dam thuai theihna turin duhsakna an hlan bawk a ni