Assam : PM-in Kaziranga Elevated Corridor Project lungphum phum

Prime minister Narendra Modi chuan nimin, Pathianni khan Assam-a Nagaon district-a Kaliabor-ah Kaziranga Elevated Corridor Project lungphum a phum. He project hi ramsa himna tur leh inthlunzawmna tihchangtlunna tura infrastructure lama hmalakna a ni. PM hian virtual-in Amrit Bharat rel pahnih a vailiam bawk.

Km 86-a thui corridor hian Kaziranga National Park leh Tiger Reserve-a ramsa chetlate an himna tura duan niin, NH-715-a lirthei chetsualna thleng ṭhin a tihtlem dawn bakah, central leh Upper Assam-a inthlunzawmna a thuam chak dawn tih official-te chuan an sawi.

Rs vbc 6,957 senna tur project-ah hian corridor hi Kaziranga National Park kaltlangin km 35-a thui ramngawah siam a ni dawn a, km 21-a thui bypass section siamin NH-715 ah km 30-a thui chu lane pahnih aṭanga paliah tihzauh a ni bawk ang. Project hian ecotourism thuam chakin, tualchhung mite tan hnathawh tur tam tak a siam dawn bawk a ni.

Infrastructure project hi National Highways and Infrastructure Development Corporation Limited (NHIDCL) chuan Ministry of Road Transport and Highways hnuaiah a thawk dawn a, thla 36 chhunga zawhfel hman tum a ni.

PM hian Amrit Bharat Express train pahnih - Dibrugarh-Gomti Nagar (Lucknow) leh Kamakhya-Rohtak inkara tlan turte chu virtual-in a vailiam bawk. Heng rel service te hian assam leh state dang eng emaw zat - West Bengal, Bihar, Uttar Pradesh, Delhi, leh Haryana inkalpawhna a tihchangtlun bakah, zinna atana hun hman pawh a tihtawi theih phah dawn tih official-te chuan an sawi.