Manipur : MoS-in urban development scheme endik

Union minister of state for housing and urban affairs, Tokhan Sahu chuan Inrinni khan Ministry of Housing and Urban Affairs (MoHUA) hnuaia hnathawh mek endikna, state-level review meeting chu Old Secretariat, Imphal-ah a kaihruai. He hunah hian Central Public Works Department (CPWD), Housing and Urban Development Corporation Limited (HUDCO) leh, National Buildings Construction Corporation (NBCC) hnuaia project hnathawhte endik a ni.

Meeting-ah hian official-te chuan Manipur-a sorkar laipui aṭanga flagship programme hrang hrang hnathawh meka hmasawnnate an sawilang. Bawlhhlawh awm lohna leh faina kalpui tumna, Swachh Bharat Mission-Urban (SBM-U) 2.0 hnuaiah bawlhhlawh sawngbawl, tui tihthianghlim leh vantlang inthiarna project hrang hrang hmasawnna pawh thlirlet a ni bawk.

Pradhan Mantri Awas Yojana-Urban (PMAY-U) chungchangah official-te chuan Beneficiary-Led Construction (BLC) state-ah kalpui a nih thu an sawi. Kum 2015, June thlaa tlangzarh PMAY-U 1.0 tihkhawtlai a nih chhan pawh tarlan niin, kum 2024 September thlaa tlangzarh, PMAY-U 2.0 chu kum nga chhungin hman ṭan a nih tur thu an sawi.

Ennawnna an neihah hian kum 2024-a zawhfel tawh Deendayal Antyodaya Yojana-National Urban Livelihoods Mission (DAY-NULM) pawh a tel. Official-te chuan self-help group (SHG) 3,535 din a nih thu sawiin, mi 10,734-te chu skill training pek an nih bakah, a chhawr ṭangkaitu mi 9,666- te chu hna pek an ni tih an tarlang. SHG leh mimal hnenah bank hmanga ṭanpui an ni tih an sawi bawk.