Meghalaya : Department of Commerce and Industries leh Amazon-in MoU ziak

Meghalaya Department of Commerce and Industries chuan Inrinni khan Amazon nen thawh dunna tur inremna Memorandum of Understanding (MoU) an ziak. Hei hi tualchhung sumdawnna tihhmasawnna atan leh market zau zawka inzarpharhna atana hmalakna a ni a, inremna an siam hi state sorkar leh e-commerce lian thawh dun vawikhatna a ni.

Directorate of Commerce and Industries-a MoU ziahnaah hian state hmun hrang hrang aṭanga small leh medium-scale sumdawnna neitu 100 chuang an tel a ni. He hunah hian Amazon team-te chuan Karigar leh Saheli hmalakna an neih dante an pholang a, puantah ṭhinte bakah hmeichhe entrepreneur-te chuan e-commerce platform hmangin an thil siam chhuahte an pholang bawk.

Department official-te chuan MSME-te chu Amazon-ah hian inziaklut turin an fuih a, an thil siam chhuahte chu ramchhung leh ram pawna hralh chhuah theihna hun remchang an nei dawn tih an tarlang. An hmalakna mumal taka kalpui a nih theihna atan leh, e-commerce platform nen inzawmna nghet zawk an neih theihna turin kut hnathawktute puih an tiam bawk.

Commerce and Industries director, F Sutnga chuan Amazon nen an thawh dunna chuan tualchhung entrepreneur-te tan hun rei tak chhung hamṭhatna a thlen a beisei thu sawiin, MSME-te tan market zau zawka an inzarpharhna kawngah a pui dawn a; puahtah, handicraft, leh thil siam chhuah lama mi thiamte a pui dawn a ni, a ti.