Rs vbc 13,000 man hu ruihhlo tawlhruk thubuaiah Sikkim mi man

Delhi Police Special Cell chuan Sikkim-a cheng mi pakhat chu ruihhlo tawlhrukna lian tham tak, Rs vbc 13,000 vel man hu kaihhnawihah an man tih an tarlang.

An mi man hi Tilak Prasad Sharma (40) niin, Sikkim-a East Pendam-a cheng a ni. Kum 2024-a NDPS Act leh Bharatiya Nyaya Sanhita nuaia kum 2024-a Special Cell police station-a FIR ziah luhah telh a ni a, police-te chuan court-in non-bailable warrant a tihchhuah hnuah an man tih an sawi.

Police-te chuan Sarma an manna case hi Thailand aṭanga cocaine kg 1,290 leh mephedrone kg 40 tawlh luh an man kaihhnawih a ni tih an sawi a, an ruihhlo man hi international market-ah Rs vbc 13,000 hu a tling. He thubuai kaihhnawihah state hrang hranga beihpui thlaknaah hian mi 17 an man tawh a, hetih lai hian inhnamhnawih dang eng emaw zat chu an la bibo a ni, man ngei tuma zawn chhunzawm zel an nih tur thu Deputy Commissioner of Police (Special Cell) Amit Kaushik chuan a sawi a ni. Ruihhlo tawlhruknaa a bultumtu, Virendra Basoya chu ram pawnah a awm mek a, a fapa Rishabh ram pawna awm mek lakah Red Corner Notice tihchhuah a ni tawh bawk.

Sarma hi ruihhlo thawn darh kawngah chanvo pawimawh tak pek niin police-te chuan an sawi a, an chhuichiannaah Thailand aṭanga marijuana tawlh luhnaah pawh ṭum eng emaw zat a inhnamhanwih niin an tarlang.