Meghalaya : ACHIK member thah thubuaiah mi 8 man

Meghalaya-a West Garo Hills police-te chuan Rajabala police station hnuai, Goalgan-a ACHIK pawl member pakhat thah a nih kaihhnawihah mi pariat an man. Police superintendent Abraham T. Sangma chuan Meghalaya leh Assam hmun hrang hrangah he inthahna thlenga inhnamhnawihte zawn beihpui an thlak hnu kar khatnaah man an ni tih a sawi. Thubuai hi Rajabala Police Station-ah ziah luh a ni.

An mi mante hi Anarul Islam (30), Rafiqul Islam (47), Atowar Hussain (40), Ariful Islam (30), Ashadur Sk. (21), Mozidur Hussain (22), Mofidur Hussain (33) leh Mozahidur Rahman (22) te an ni. He thubuai chhuizui tur hian Special Investigation Team (SIT) din a ni a, team hi Dadenggre-a sub-divisional police officer R.A. Sangma chuan a kaihruai a ni. Police superintendent chuan he pawikhawihnaa inhnamhnawih dang pawh man belh an ni dawn tih a tarlang.

Police-te chuan mipuite chu pawikhawihna thleng chungchanga thu thar hriat an nei a nih chuan police hriattir vat turin thuchhuah an siam. District police-te chuan helai huam chhunga cheng mipuite chu remna leh muanna vawng nung turin an chah a, thudik lo thehdarh lo turin an hriattir bawk.

Police-te chuan he inbeihna hi kar liam ta Zirtawpni chawhnu dar 2 vela thleng niin an sawi a, nunna chan hi Dilseng M. Sangma, Amokgre, Phulbari-a cheng a ni. Sangma hi mi tu tih hriat lohten Goalgoan-ah hian an bei a, Bhaitbari Community Health Centre-ah hruai niin, enkawlna ṭha zawk dawng tura Tura Civil Hospital an panpui laiin a thi a ni.