Assam : Assam Rifle-ten yaba tablet Rs vbc 39 man hu an man

Assam Cachar district-a Assam Rifle leh Directorate of Revenue Intelligence (DRI) thawk dunin ruihhlo do beihpui an thlakna kal zelah yaba tablet 1,30,000, Rs vbc 39 man hu an man. Ruihhlo neitu mi pathum, Tripura-a chengte chu a hmunah hian man nghal an ni a, an kut aṭangin mobile phone pahnih man sak niin chhui zuina atan hman a ni dawn tih official-te chuan sawi.

Thuneitute chuan ruihhlo hi Cachar corridor kaltlanga phurh chhuah a nih an rin thu sawiin, helai hmun hi Assam aṭanga Tripura leh hmarchhak bial hmun dang inthlunzawmna a ni. Ruihhlo network nena inzawmna hriatchhuah tumin chhui chianna neih chhunzawm zel a ni bawk.

Security agency-te chuan ruihhlo an man hian Assam highway chu ruihhlo tawlhrukna atan hman reng a la ni tih a tilang chiang hle an ti. Assam Rifle-te chuan helai biala ruihhlo do kawnga hmalakna chu supply chain tihchhiatna atan a pawimawh thu an tarlang.

Hetih mek lai hian Goalpara police-te chuan National Highway-17-a beihpui an thlaknaah yaba tablet ṭhahnem tak an man bawk. Police-te hian Agia police station huam chhung, Bhimajuli bula lirthei an endiknaah yaba tablet 4,000 manin, a neitu Sirajul Islam, Krishnai-a cheng an man nghal bawk. Beihpui thlakna hi West Goalpara Co-District police officer Abhilash Baruah leh, deputy superintendent of police Alangkrita Saikia-te kaihhruainaa neih a ni. Police thuchhuah chuan ruihhlo an man chu Rs nuai 4 man hu a nih thu an sawi. An mi man hi hren zui nghal niin chhui chianna neih a ni bawk.