Manipur-in inrelbawlna chak tak a mamawh: MLA Thongam Biswajit

Manipur MLA Thongam Biswajit Singh chuan Thawhṭanni khan mipui aw ngaithlatu leh lainatna nena state inrelbawlna chak tak kalpui thei tur an mamawh tih a sawi. Mawhphurhna hlen chhuak thei leh hruaitu chak tak chuan state damna leh buaina thleng mek a titawp thei a ni, a ti.

MLA Biswajit chuan he thu hi one-day get-together for peace and harmony-cum-music concert, Panchai Town Hall, Chandel district headquarters-a neiha khuallian a nihnaah a sawi. He hun hi 'Heal Our Land' tih thupui hmanga All Tribal Film Organisation, Manipur (ATFOM) buatsaih a ni a, Kankhu Film & Entertainment Society, Chandel chuan a host thung a ni.

Thongju Assembly Constituency MLA chuan Manipur chu hmanlai aṭang tawhin hnam hrang hrang khawsak hona a nih thu sawiin, danglamna tam tak nei mah se, chanvo inang an inṭawm tih a sawi. Tun hnaia state-a buaina chhuak chungchang pawh sawilangin, Biswajit chuan an dinhmun tawn mek chuan mipui dawhtheihna, inngaihtlawmna leh mihring nihna a fiah a ni, a ti. Mi tam takin an chenna in leh lo an chan phah tih sawiin, mipui inrintawnna a keh chhia a, pawisawi lo tam takin an tuar tih a sawi bawk.

MLA chuan huatna chu huatna bawkin a tidam thei lo a, tharum thawhna chuan tharum thawhna thleng ṭhin a siam ṭha thei lo a, dan bawhchhiatna chuan hmalam hun a ti chhia a ni, a ti. Inhuatna ni loin huaisenna, lainatna leh finna chu hnam damna a ni tih a sawi. Hun rei tak chhung remna leh muanna a awm theihna atan rorelna dik kalpui a ṭul tih a tarlang.