Meghalaya : Police-ten Bangladesh mi 18 an man

Meghalaya-a West Jaintia Hills police-te chuan January 20-a beihpui an thlaknaah Bangladesh mi 18 leh India khua leh tui pahnih an man. He beihpui thlakna hi zing dar 3 vela neih niin, West Jaintia Hills police special team bakah khaw hruaitu leh Demthring khuaa Vilage Defence Party (VDP) te thawk ho chuan India-Bangladesh ramriah foreign lirthei, document mumal nei lo eng emaw zat an man bawk a ni.

Bangladesh mi leh sate hi Jowai aṭanga Dawki panpui an ni tih an hriat hnuah, thuneitute chuan lirthei registration number ML-04D/7339, Vishal Dkhar khalh aṭangin mi pali an man hmasa ber a ni. Lirthei hi Sanmala Guest House, Amlarem-ah tihdin a ni. India khua leh tui pahnih, Meban Dkhar leh Melari Rasmut-te pawh Lad Demthring-ah an lirthei khalh lai nen man an ni bawk.

Hemi hnuah lirthei dang Bangladesh mi leh sa phur dang an awm tih hriat chhuah leh niin, police-te chuan Amlarem huam chhungah hian zing dar 3:45 velah lirthei pathum aṭangin Bangladesh mi 14 an man belh leh a ni. An mi mante hi hren an nih bakah chhuizuina neih a ni ang. Thuneitute chuan Immigration and Foreigners Act, 2025 hmangin thubuai an theh lut tih press thuchhuah chuan a tarlang.